aap hi aasan ho jaegi har mushkil abhi

aap hī āsān ho jā.egī har mushkil abhī

ho to le terā kahe jaane ke qābil dil abhī

koshish-e-andāza-e-zillat hai lā-hāsil abhī

dekhiye kyā kyā na dikhlā.e ye shauq-e-dil abhī

jazr-o-mad meñ yuuñ kahāñ beḌā lagā de nāḳhudā

ho to le ghaT-baḌh ke qaa.em ik jagah sāhil abhī

hashr tak ThanDā na hogā josh-e-ḳhūn-e-be-gunāh

karvaTeñ legā hazāroñ aap kā bismil abhī

hai saḳhī kā dar to kyā 'ujlat hai ai shauq-e-savāl

dene vaale kī nazar to dekh le saa.il abhī

har qadam par thaam kar baazū yahī kahtā hai shauq

uTh thake-māñde musāfir aatī hai manzil abhī

aaḌ lī jis kī vahī dīvār sar par aa ga.ī

jis jagah Duubī hai kashtī thā yahī sāhil abhī

raat guzrī sham' pighlī ḳhaak parvāne hue

ham yahī sochā kiye jam le zarā mahfil abhī

sa.i hai bekār aao baiTh kar ro.eñ 'iram'

pā-e-shal uThte nahīñ aur duur hai manzil abhī

aap hi aasan ho jaegi har mushkil abhi

ho to le tera kahe jaane ke qabil dil abhi

koshish-e-andaza-e-zillat hai la-hasil abhi

dekhiye kya kya na dikhlae ye shauq-e-dil abhi

jazr-o-mad mein yun kahan beDa laga de naKHuda

ho to le ghaT-baDh ke qaem ek jagah sahil abhi

hashr tak ThanDa na hoga josh-e-KHun-e-be-gunah

karwaTen lega hazaron aap ka bismil abhi

hai saKHi ka dar to kya 'ujlat hai ai shauq-e-sawal

dene wale ki nazar to dekh le sail abhi

har qadam par tham kar bazu yahi kahta hai shauq

uTh thake-mande musafir aati hai manzil abhi

aaD li jis ki wahi diwar sar par aa gai

jis jagah Dubi hai kashti tha yahi sahil abhi

raat guzri sham' pighli KHak parwane hue

hum yahi socha kiye jam le zara mahfil abhi

sai hai bekar aao baiTh kar roen 'iram'

pa-e-shal uThte nahin aur dur hai manzil abhi