aap hi naKHuda raha hun main

aap hī nāḳhudā rahā huuñ maiñ

aap hī Dūbtā rahā huuñ maiñ

ishq se āshnā rahā huuñ maiñ

husn kā mudda.ā rahā huuñ maiñ

kahīñ terā bharam na khul jaa.e

ḳhud ko ḳhud se chhupā rahā huuñ maiñ

raunaq-e-do-jahāñ mujhī se haiñ

aa rahā huuñ maiñ jā rahā huuñ maiñ

jaise koī bhī haq na ho mujh ko

yuuñ tujhe dekhtā rahā huuñ maiñ

ai junūñ ab to rahbarī farmā

harf-e-matlab pe aa rahā huuñ maiñ

mere zimme hai kis qadar mushkil

jāgte ko jagā rahā huuñ maiñ

ai ḳhudā tujh se kuchh na maañg sakūñ

ye duā māñgtā rahā huuñ maiñ

gumrahī kā mujhe na de ilzām

tujh ko pahchāntā rahā huuñ maiñ

ye zamāna bhī dekhnā thā mujhe

tujh se āñkheñ churā rahā huuñ maiñ

zarf merā buland hai 'tāriq'

jaan kar hārtā rahā huuñ maiñ

aap hi naKHuda raha hun main

aap hi Dubta raha hun main

ishq se aashna raha hun main

husn ka muddaa raha hun main

kahin tera bharam na khul jae

KHud ko KHud se chhupa raha hun main

raunaq-e-do-jahan mujhi se hain

aa raha hun main ja raha hun main

jaise koi bhi haq na ho mujh ko

yun tujhe dekhta raha hun main

ai junun ab to rahbari farma

harf-e-matlab pe aa raha hun main

mere zimme hai kis qadar mushkil

jagte ko jaga raha hun main

ai KHuda tujh se kuchh na mang sakun

ye dua mangta raha hun main

gumrahi ka mujhe na de ilzam

tujh ko pahchanta raha hun main

ye zamana bhi dekhna tha mujhe

tujh se aankhen chura raha hun main

zarf mera buland hai 'tariq'

jaan kar haarta raha hun main