aap karishma-saz hue hain hosh mein hai diwana bhi

aap karishma-sāz hue haiñ hosh meñ hai dīvāna bhī

husn-e-adā hai naam usī kā hairāñ hai parvāna bhī

vaqt ne aisī karvaT badlī phuul khile bastī ujḌī

vahshat kā vo zor baḌhā ābād huā vīrāna bhī

raat kī mahfil-ārā.ī kā pichhle pahar ahvāl na pūchh

sham.a kī lau bhī sard paḌī thī raakh huā parvāna bhī

tanhā.ī se ghabrā kar ham kyā kyā shikve karte the

lekin jab se aap mile haiñ dost huā begāna bhī

dam ke dam meñ duniyā badlī bhiiḌ chhaTī kohrām uThā

chalte chalte saañs rukī aur ḳhatm huā afsāna bhī

maiñ bhī sajda kar luuñ 'nāmī' lekin dil ko dhaḌkan hai

kyā ye vahī ka.aba to nahīñ jo kal tak thā but-ḳhāna bhī

aap karishma-saz hue hain hosh mein hai diwana bhi

husn-e-ada hai nam usi ka hairan hai parwana bhi

waqt ne aisi karwaT badli phul khile basti ujDi

wahshat ka wo zor baDha aabaad hua virana bhi

raat ki mahfil-arai ka pichhle pahar ahwal na puchh

shama ki lau bhi sard paDi thi rakh hua parwana bhi

tanhai se ghabra kar hum kya kya shikwe karte the

lekin jab se aap mile hain dost hua begana bhi

dam ke dam mein duniya badli bhiD chhaTi kohram uTha

chalte chalte sans ruki aur KHatm hua afsana bhi

main bhi sajda kar lun 'nami' lekin dil ko dhaDkan hai

kya ye wahi kaba to nahin jo kal tak tha but-KHana bhi