aap ke KHun mein adakari kahan se aa gai

aap ke ḳhuuñ meñ adākārī kahāñ se aa ga.ī

aap nādāñ the samajhdārī kahāñ se aa ga.ī

is chaman ke peḌ-paude ham ne sīñche ḳhuun se

aap ke hāthoñ meñ ye aarī kahāñ se aa ga.ī

jin buzurgoñ ne luTā.e jān-o-dil islām par

un ke bachchoñ meñ ye ġhaddārī kahāñ se aa ga.ī

dard aziyyat qatl-o-ġhārat aap kā sheva rahā

phir achānak ye ravādārī kahāñ se aa ga.ī

rūThnā paiham manānā chhoḌ jaanā raah meñ

aap meñ jaane adākārī kahāñ se aa ga.ī

us ne dekhā pyaar se to mil ga.ī rāhat mujhe

maiñ thī hairāñ us meñ dildārī kahāñ se aa ga.ī

ai 'anā' tum mat girānā apne hī kirdār ko

un ko kahne do ki ḳhud-dārī kahāñ aa ga.ī

aap ke KHun mein adakari kahan se aa gai

aap nadan the samajhdari kahan se aa gai

is chaman ke peD-paude hum ne sinche KHun se

aap ke hathon mein ye aari kahan se aa gai

jin buzurgon ne luTae jaan-o-dil islam par

un ke bachchon mein ye ghaddari kahan se aa gai

dard aziyyat qatl-o-ghaarat aap ka shewa raha

phir achanak ye rawadari kahan se aa gai

ruThna paiham manana chhoD jaana rah mein

aap mein jaane adakari kahan se aa gai

us ne dekha pyar se to mil gai rahat mujhe

main thi hairan us mein dildari kahan se aa gai

ai 'ana' tum mat girana apne hi kirdar ko

un ko kahne do ki KHud-dari kahan aa gai