آپ کے خوں میں اداکاری کہاں سے آ گئی

آپ کے خوں میں اداکاری کہاں سے آ گئی

آپ ناداں تھے سمجھ داری کہاں سے آ گئی

اس چمن کے پیڑ پودے ہم نے سینچے خون سے

آپ کے ہاتھوں میں یہ آری کہاں سے آ گئی

جن بزرگوں نے لٹائے جان و دل اسلام پر

ان کے بچوں میں یہ غداری کہاں سے آ گئی

درد اذیت قتل و غارت آپ کا شیوہ رہا

پھر اچانک یہ رواداری کہاں سے آ گئی

روٹھنا پیہم منانا چھوڑ جانا راہ میں

آپ میں جانے اداکاری کہاں سے آ گئی

اس نے دیکھا پیار سے تو مل گئی راحت مجھے

میں تھی حیراں اس میں دل داری کہاں سے آ گئی

اے اناؔ تم مت گرانا اپنے ہی کردار کو

ان کو کہنے دو کہ خود داری کہاں آ گئی