aap ki chashm-e-inayat kabhi aisi to na thi

aap kī chashm-e-ināyat kabhī aisī to na thī

aur taġhāful pe nadāmat kabhī aisī to na thī

yaad aatā huuñ maiñ kyoñ tark-e-ta.alluq par bhī

mehrbāñ mujh se mohabbat kabhī aisī to na thī

aap ke lutf-o-karam kī maiñ tamanna kartā

ġham-o-ālām se fursat kabhī aisī to na thī

zahe qismat rasan-o-dār ke laa.eq Thahrā

apnī ham chashmoñ meñ izzat kabhī aisī to na thī

tere aariz kā hai ye aks ki āġhāz-e-bahār

apne gulshan kī latāfat kabhī aisī to na thī

apnī barbād-e-mohabbat pe tahayyur kaisā

un se ummīd-e-rifāqat kabhī aisī to na thī

ashk kyoñ Dhalte nahīñ āñkhoñ se barsoñ 'manzar'

mere dāman ko shikāyat kabhī aisī to na thī

aap ki chashm-e-inayat kabhi aisi to na thi

aur taghaful pe nadamat kabhi aisi to na thi

yaad aata hun main kyon tark-e-talluq par bhi

mehrban mujh se mohabbat kabhi aisi to na thi

aap ke lutf-o-karam ki main tamanna karta

gham-o-alam se fursat kabhi aisi to na thi

zahe qismat rasan-o-dar ke laeq Thahra

apni hum chashmon mein izzat kabhi aisi to na thi

tere aariz ka hai ye aks ki aaghaz-e-bahaar

apne gulshan ki latafat kabhi aisi to na thi

apni barbaad-e-mohabbat pe tahayyur kaisa

un se ummid-e-rifaqat kabhi aisi to na thi

ashk kyon Dhalte nahin aankhon se barson 'manzar'

mere daman ko shikayat kabhi aisi to na thi