aap ki nazar-e-inayat ho gai

aap kī nazar-e-ināyat ho ga.ī

zindagī marhūn-e-minnat ho ga.ī

mil ga.e do dil mohabbat ho ga.ī

baat bas itnī qayāmat ho ga.ī

kyoñ fuzūñ-tar aaj vahshat ho ga.ī

kyā kisī manzil se qurbat ho ga.ī

aap ham par multafit kyā ho ga.e

ham se duniyā ko adāvat ho ga.ī

ho ga.e kyā kyā fasāne sar-buland

sar-nigūñ saarī haqīqat ho ga.ī

aap ne ġham de diyā kyā kam diyā

chaar din jiine kī sūrat ho ga.ī

naam un kā jab zabāñ par aa gayā

yuuñ bhī goyā ik ibādat ho ga.ī

ho ga.ī jab bhī jahālat muqtadir

dar-ba-dar 'āmir' farāsat ho ga.ī

aap ki nazar-e-inayat ho gai

zindagi marhun-e-minnat ho gai

mil gae do dil mohabbat ho gai

baat bas itni qayamat ho gai

kyon fuzun-tar aaj wahshat ho gai

kya kisi manzil se qurbat ho gai

aap hum par multafit kya ho gae

hum se duniya ko adawat ho gai

ho gae kya kya fasane sar-buland

sar-nigun sari haqiqat ho gai

aap ne gham de diya kya kam diya

chaar din jine ki surat ho gai

nam un ka jab zaban par aa gaya

yun bhi goya ek ibaadat ho gai

ho gai jab bhi jahaalat muqtadir

dar-ba-dar 'amir' farasat ho gai