aapko mujhse mohabbat kaisi

aap ko mujh se mohabbat kaisī

aur agar hai to shikāyat kaisī

haa.e saḌkoñ pe ye nange bachche

mulk ḳhush-hāl to ġhurbat kaisī

apne zāhid se koī pūchhe to

ye riyā-kār ibādat kaisī

chheḌne kā to nahīñ huuñ aadī

mere kirdār pe hairat kaisī

be-irāda mire ghar ā.iyegā

maiñ na pūchhūñgā ye fursat kaisī

apne shaidā.ī pe ye zulm-o-sitam

jān-e-jāñ aap kī aadat kaisī

maiñ huuñ be-nām sā āvāra sā

aap kī mujh pe ināyat kaisī

kufr-o-ilhād se Takrāte ho

ai 'jamāl' aap kī himmat kaisī

sab ko nā-qadri-e-fan kā hai gila

ai 'jamāl' aap kī hurmat kaisī

aap ko mujh se mohabbat kaisi

aur agar hai to shikayat kaisi

hae saDkon pe ye nange bachche

mulk KHush-haal to ghurbat kaisi

apne zahid se koi puchhe to

ye riya-kar ibaadat kaisi

chheDne ka to nahin hun aadi

mere kirdar pe hairat kaisi

be-irada mere ghar aaiyega

main na puchhunga ye fursat kaisi

apne shaidai pe ye zulm-o-sitam

jaan-e-jaan aap ki aadat kaisi

main hun be-nam sa aawara sa

aap ki mujh pe inayat kaisi

kufr-o-ilhad se Takraate ho

ai 'jamal' aap ki himmat kaisi

sab ko na-qadri-e-fan ka hai gila

ai 'jamal' aap ki hurmat kaisi