aap kya jaanen mohabbat ka tamasha kya hai

aap kyā jāneñ mohabbat kā tamāshā kyā hai

sho.ala-e-ishq kise kahte haiñ saudā kyā hai

koī ḳhush hai koī nā-ḳhush koī shākī tujh se

kaun jaane ki tirī bazm kā qissa kyā hai

sāġhar-e-mahr-o-vafā daur meñ thā sub.h-o-masā

jaane ab majlis-e-ahbāb kā naqsha kyā hai

ilm-e-taqdīr pe mauqūf nahīñ merā amal

kaun jaane mirī taqdīr kā likkhā kyā hai

jis ke imroz meñ baaqī na rahe rūh-e-hayāt

saaf zāhir hai ki us qaum kā fardā kyā hai

jagmagāte ye sitāre ye falak ke ḳheme

'tuu' ne parde to ye dekhe pas-e-parda kyā hai

kārsāzī pe ḳhudā kī hai bharosa varna

maiñ agar jaan laḌā.ūñ bhī to hotā kyā hai

sar hathelī pe liye phirte haiñ jo log 'urūj'

un se pūchho ki mohabbat kā tarīqa kyā hai

aap kya jaanen mohabbat ka tamasha kya hai

shoala-e-ishq kise kahte hain sauda kya hai

koi KHush hai koi na-KHush koi shaki tujh se

kaun jaane ki teri bazm ka qissa kya hai

saghar-e-mahr-o-wafa daur mein tha subh-o-masa

jaane ab majlis-e-ahbab ka naqsha kya hai

ilm-e-taqdir pe mauquf nahin mera amal

kaun jaane meri taqdir ka likkha kya hai

jis ke imroz mein baqi na rahe ruh-e-hayat

saf zahir hai ki us qaum ka farda kya hai

jagmagate ye sitare ye falak ke KHeme

'tu' ne parde to ye dekhe pas-e-parda kya hai

karsazi pe KHuda ki hai bharosa warna

main agar jaan laDaun bhi to hota kya hai

sar hatheli pe liye phirte hain jo log 'uruj'

un se puchho ki mohabbat ka tariqa kya hai