aap kyun chheDte hain dipak rag

aap kyuuñ chheḌte haiñ dīpak raag

shahr meñ lag rahī hai ḳhud hī aag

uTh rahā hai harīm-e-dil se dhuāñ

luT rahā hai suhāganoñ kā suhāg

sho.ala-sāmāñ huī hai tārīkī

kaise jaage haiñ raushnī ke bhaag

jaane kis kis havas ko deñge janam

botaloñ ke uḌā chuke jo kaag

laag meñ thī kabhī lagāv kī shaan

ab laboñ meñ lagāv kī hai laag

kaf-e-dariyā kā dekhiye anjām

be-sabab lā.iye na muñh meñ jhaag

jaate lamhe duhā.ī dete haiñ

na.e atvār ke tarīq pe jaag

muskurātā hai khet sarsoñ kā

toḌtī haiñ jo gaañv vāliyāñ saag

sarkañDoñ meñ hai keñchulī aTkī

kahīñ lahrā ke chhup gayā hai naag

chāñd par jo kamand Dālte haiñ

mujh se kahte haiñ zindagī bhī tyaag

aap kyun chheDte hain dipak rag

shahr mein lag rahi hai KHud hi aag

uTh raha hai harim-e-dil se dhuan

luT raha hai suhaganon ka suhag

shoala-saman hui hai tariki

kaise jage hain raushni ke bhag

jaane kis kis hawas ko denge janam

botalon ke uDa chuke jo kag

lag mein thi kabhi lagaw ki shan

ab labon mein lagaw ki hai lag

kaf-e-dariya ka dekhiye anjam

be-sabab laiye na munh mein jhag

jate lamhe duhai dete hain

nae atwar ke tariq pe jag

muskuraata hai khet sarson ka

toDti hain jo ganw waliyan sag

sarkanDon mein hai kenchuli aTki

kahin lahra ke chhup gaya hai nag

chand par jo kamand Dalte hain

mujh se kahte hain zindagi bhi tyag