aap naraaz hain aur hum bhi to sharminda hain

aap nārāz haiñ aur ham bhī to sharminda haiñ

donoñ din-rāt taḌapte haiñ magar zinda haiñ

shāḳh-e-mizhgāñ pe ubhar aa.e haiñ kuchh naqsh-e-jamāl

zehn kī ḳhaak meñ chehre ka.ī tābinda haiñ

shabnamī raat ke phūloñ ne utāre haiñ libās

garm poshāk meñ sūraj ke numā.inda haiñ

dil kī dhaḌkan bhī vahī saañs ke naġhme bhī vahī

har rag-o-reshe tire naam ke sāzinda haiñ

surḳh āñkhoñ ne jalā rakkhe haiñ paanī ke charāġh

kuchh sitāre bhī sar-e-shām daraḳhshanda haiñ

amn kī bhiik bhī miltī nahīñ jiine ke liye

jaane kis mulk ke ujḌe hue bāshinda haiñ

dekhiye hāl-e-pareshāñ ko ulaT kar 'ulfat'

ham kisī maazī ke kho.e hue ā.inda haiñ

aap naraaz hain aur hum bhi to sharminda hain

donon din-raat taDapte hain magar zinda hain

shaKH-e-mizhgan pe ubhar aae hain kuchh naqsh-e-jamal

zehn ki KHak mein chehre kai tabinda hain

shabnami raat ke phulon ne utare hain libas

garm poshak mein suraj ke numainda hain

dil ki dhaDkan bhi wahi sans ke naghme bhi wahi

har rag-o-reshe tere nam ke sazinda hain

surKH aankhon ne jala rakkhe hain pani ke charagh

kuchh sitare bhi sar-e-sham daraKHshanda hain

amn ki bhik bhi milti nahin jine ke liye

jaane kis mulk ke ujDe hue bashinda hain

dekhiye haal-e-pareshan ko ulaT kar 'ulfat'

hum kisi mazi ke khoe hue aainda hain