aap nigah-e-mast se patthar ko aab kijiye

aap nigāh-e-mast se patthar ko aab kījiye

thāmiye aab haath meñ aur sharāb kījiye

kār-e-vafā kā jab nahīñ koī sila janāb-e-ishq

banda nayā talāshiye merā hisāb kījiye

aa hī ga.e haiñ aap to itnā karam ki do qadam

chal ke hamāre saath dil sab ke kabāb kījiye

chaa.e meñ mat milā.iye shakar ki hai zarar-risāñ

shāmil miThās vāste apnā luaab kījiye

ham ne kahā ki aap ke hoñToñ se ek kaam hai

band-e-naqāb khol kar bole janāb kījiye

tohmat-e-zohd le ke ham baiThe hue haiñ muntazir

kuchh to qarīb aa.iye kuchh to ḳharāb kījiye

daal nahīñ janāb kī galne kī bazm-e-husn meñ

uThiye nashist chhoḌiye band kitāb kījiye

aap nigah-e-mast se patthar ko aab kijiye

thamiye aab hath mein aur sharab kijiye

kar-e-wafa ka jab nahin koi sila janab-e-ishq

banda naya talashiye mera hisab kijiye

aa hi gae hain aap to itna karam ki do qadam

chal ke hamare sath dil sab ke kabab kijiye

chae mein mat milaiye shakar ki hai zarar-risan

shamil miThas waste apna luab kijiye

hum ne kaha ki aap ke honTon se ek kaam hai

band-e-naqab khol kar bole janab kijiye

tohmat-e-zohd le ke hum baiThe hue hain muntazir

kuchh to qarib aaiye kuchh to KHarab kijiye

dal nahin janab ki galne ki bazm-e-husn mein

uThiye nashist chhoDiye band kitab kijiye