آپ سے کس نے کہا ہے کہ محبت کریے

آپ سے کس نے کہا ہے کہ محبت کریے

آپ تاجر ہیں مرے غم کی تجارت کریے

بے وضو عشق کی تکمیل ہے توہین صنم

کر رہے ہیں تو سلیقے سے عبادت کریے

عشق میں کفر کہا جاتا ہے شکوہ کا عمل

اس لئے سوچ سمجھ کر ہی شکایت کریے

سر کی خواہش ہے تو ہم اہل جنوں دے دیں گے

آپ تلوار اٹھانے کی نہ زحمت کریے

اب کہاں ملتا ہے دیوانہ کوئی صحرا میں

گر مقدر سے وہ مل جائے تو عزت کریے

کان میں سیسۂ غم گھول کے فرماتے ہیں

قصۂ عشق میری جان سماعت کریے

دیدۂ نم پہ بچھا کر ہی مصلیٰ دل کا

اشک بن کر مرے جذبوں کی امامت کریے