aap to baat ka aKHbar bana dete hain

aap to baat kā aḳhbār banā dete haiñ

ghar kā māhaul pur-asrār banā dete haiñ

ba.az āñkhoñ ko takallum bhī atā hotā hai

apnī ḳhāmoshī ko iz.hār banā dete haiñ

ab shikāyat na karo aap ne jo dard diye

ham ko piine kā ravādār banā dete haiñ

husn-e-mutlaq tujhe ma.alūm kahāñ lazzat-e-dīd

aa tujhe tālib-e-dīdār banā dete haiñ

aap kī jumbish-e-abrū ye ishāre ye kinā.e

baat ko aur mazedār banā dete haiñ

aise ahkām bhī takvīn kī sā.āt meñ haiñ

jo farishtoñ ko ḳhatā-kār banā dete haiñ

ham bhī aazar haiñ agar aap haiñ patthar kī chaTān

ā.īye aap ko shahkār banā dete haiñ

maiñ kahāñ tum se milā raat kahāñ chāñdnī thī

yūñhī bas baat mire yaar banā dete haiñ

dekh kar lauh-e-lahad dil meñ ḳhayāl aatā hai

sar banāte nahīñ dastār banā dete haiñ

ham ne dekhā hai karishma ye tire āhan-gar

pal meñ zanjīr ko talvār banā dete haiñ

aap to baat ka aKHbar bana dete hain

ghar ka mahaul pur-asrar bana dete hain

baz aankhon ko takallum bhi ata hota hai

apni KHamoshi ko izhaar bana dete hain

ab shikayat na karo aap ne jo dard diye

hum ko pine ka rawadar bana dete hain

husn-e-mutlaq tujhe malum kahan lazzat-e-did

aa tujhe talib-e-didar bana dete hain

aap ki jumbish-e-abru ye ishaare ye kinae

baat ko aur mazedar bana dete hain

aise ahkaam bhi takwin ki saat mein hain

jo farishton ko KHata-kar bana dete hain

hum bhi aazar hain agar aap hain patthar ki chaTan

aaiye aap ko shahkar bana dete hain

main kahan tum se mila raat kahan chandni thi

yunhi bas baat mere yar bana dete hain

dekh kar lauh-e-lahad dil mein KHayal aata hai

sar banate nahin dastar bana dete hain

hum ne dekha hai karishma ye tere aahan-gar

pal mein zanjir ko talwar bana dete hain