aap to ishq mein danai liye baiThe hain

aap to ishq meñ dānā.ī liye baiThe haiñ

aur divāne haiñ ki rusvā.ī liye baiThe haiñ ham

ḳhāna-e-hijr meñ yādeñ tirī raqsāñ hoñgī

ham isī shauq meñ tanhā.ī liye baiThe haiñ

tajraba ham pe taġhāful kā na kiije varna

kuchh hunar ham bhī karishmā.ī liye baiThe haiñ

ek muddat se vo vahshat hai ki bas kyā kahiye

ghar meñ ham ik dil-e-sahrā.ī liye baiThe haiñ

taqviyat azmat-e-kirdār se paa.ī hai ki ham

nā-tavānī meñ tavānā.ī liye baiThe haiñ

tāliyāñ aaj yahāñ ḳhuub bajeñgī 'nusrat'

sab ke sab apne tamāshā.ī liye baiThe haiñ

aap to ishq mein danai liye baiThe hain

aur diwane hain ki ruswai liye baiThe hain hum

KHana-e-hijr mein yaaden teri raqsan hongi

hum isi shauq mein tanhai liye baiThe hain

tajraba hum pe taghaful ka na kije warna

kuchh hunar hum bhi karishmai liye baiThe hain

ek muddat se wo wahshat hai ki bas kya kahiye

ghar mein hum ek dil-e-sahrai liye baiThe hain

taqwiyat azmat-e-kirdar se pai hai ki hum

na-tawani mein tawanai liye baiThe hain

taliyan aaj yahan KHub bajengi 'nusrat'

sab ke sab apne tamashai liye baiThe hain