aaraish-e-gesu-e-suKHan karte rahenge

ārā.ish-e-gesū-e-suḳhan karte raheñge

be-ḳhauf-o-ḳhatar ḳhidmat-e-fan karte raheñge

ham taaza rivāyāt-e-kuhan karte raheñge

ābād rah-e-dār-o-rasan karte raheñge

tārīḳh meñ kahlā.eñge ham zulm ke haamī

bardāsht agar ranj-o-mehan karte raheñge

mujh ko hai yaqīñ mere vatan ke ka.ī farhād

teshe se ravāñ gang-o-jaman karte raheñge

muhtāj ḳhabar ke nahīñ raftār-e-sabā se

andāza-e-hālāt-e-chaman karte raheñge

jis se ki badal jaa.e ruḳh-e-gardish-e-daurāñ

koī na koī aisā jatan karte raheñge

saf bāñdheñ raheñ ahl-e-vafā ḳham rahe sar bhī

vo kahte haiñ ham hukm bazan karte raheñge

ho daur-e-ḳhizāñ laakh chaman phir bhī chaman hai

'nazmī' dil-o-jāñ nazr-e-vatan karte raheñge

aaraish-e-gesu-e-suKHan karte rahenge

be-KHauf-o-KHatar KHidmat-e-fan karte rahenge

hum taza riwayat-e-kuhan karte rahenge

aabaad rah-e-dar-o-rasan karte rahenge

tariKH mein kahlaenge hum zulm ke hami

bardasht agar ranj-o-mehan karte rahenge

mujh ko hai yaqin mere watan ke kai farhad

teshe se rawan gang-o-jaman karte rahenge

muhtaj KHabar ke nahin raftar-e-saba se

andaza-e-haalat-e-chaman karte rahenge

jis se ki badal jae ruKH-e-gardish-e-dauran

koi na koi aisa jatan karte rahenge

saf bandhen rahen ahl-e-wafa KHam rahe sar bhi

wo kahte hain hum hukm bazan karte rahenge

ho daur-e-KHizan lakh chaman phir bhi chaman hai

'nazmi' dil-o-jaan nazr-e-watan karte rahenge