aaram phir kahan hai jo ho dil mein ja-e-hirs

ārām phir kahāñ hai jo ho dil meñ jā-e-hirs

āsūda zer-e-ḳhāk nahīñ āshnā-e-hirs

mumkin nahīñ hai ye ki bhare kāsa-e-tama.a

din meñ karoḌ ghar jo phirā de gadā-e-hirs

insāñ na hoñ zalīl zamāne ke haath se

zillat kisī ko koī na deve sivā-e-hirs

kar muñh ko Tuk ba-sū-e-qanā.at ye harf maan

rahtī hai laakh tarah kī aafat qifā-e-hirs

nādāñ talāsh-e-turra-e-zar se to baaz aa

juuñ sham.a ye na ho ki tirā sar kaTā.e hirs

apne sivā kisī ko na paayā harīf haif

kī qat.a rozgār ne ham par qabā-e-hirs

'saudā' basar ho ḳhūbī se auqāt har tarah

par darmiyāñ na hove ba-shart-e-ki pā-e-hirs

aaram phir kahan hai jo ho dil mein ja-e-hirs

aasuda zer-e-KHak nahin aashna-e-hirs

mumkin nahin hai ye ki bhare kasa-e-tama

din mein karoD ghar jo phira de gada-e-hirs

insan na hon zalil zamane ke hath se

zillat kisi ko koi na dewe siwa-e-hirs

kar munh ko Tuk ba-su-e-qanaat ye harf man

rahti hai lakh tarah ki aafat qifa-e-hirs

nadan talash-e-turra-e-zar se to baz aa

jun shama ye na ho ki tera sar kaTae hirs

apne siwa kisi ko na paya harif haif

ki qata rozgar ne hum par qaba-e-hirs

'sauda' basar ho KHubi se auqat har tarah

par darmiyan na howe ba-shart-e-ki pa-e-hirs