aarasta bazm-e-aish hui ab rind piyenge khul khul ke

ārāsta bazm-e-aish huī ab riñd piyeñge khul khul ke

jhuktī hai surāhī sāġhar par naġhme haiñ fazā meñ qulqul ke

aa tujh ko banā duuñ rashk-e-chaman mīzān-e-mohabbat meñ tul ke

aariz ko guloñ kī ra.anā.ī bal zulf ko baḳhshūñ sumbul ke

gulshan meñ bahār aa.e ki ḳhizāñ murjhā.e kalī yā phuul khileñ

sayyād tujhe kyā matlab hai tū ashk gine jā bulbul ke

ham ahl-e-chaman kī nazroñ meñ kuchh aur hī ma.anā rakhtā hai

kaliyoñ kā chaTak kar khil jaanā phūloñ kā nikharnā dhul dhul ke

vo chain to shāyad rizvāñ ko jannat meñ kyā miltā hogā

jo mujh ko sukūñ mil jaatā hai saa.e meñ kisī kī kākul ke

ushshāq ke marne jiine ko itnī hī lagāvaT kaafī hai

ik choT sī tirchhī nazroñ ke do chaar jhakole kākul ke

kaun us kī fazāoñ meñ aa kar taḳhrīb ke sho.ale phūñk gayā

āḳhir ye vahī to gulshan hai rahte the jahāñ ham mil-jul ke

is daur ke pāgal insānoñ nafrat kī farāvānī kab tak

gar aaj nahīñ to kal tum ko rahnā hī paḌegā mil-jul ke

gar had se sivā pī loge 'falak' phir hosh kahāñ mai-ḳhāne kā

do-chār hī qatre kaafī haiñ pīchhe na paḌho jām-e-mul ke

aarasta bazm-e-aish hui ab rind piyenge khul khul ke

jhukti hai surahi saghar par naghme hain faza mein qulqul ke

aa tujh ko bana dun rashk-e-chaman mizan-e-mohabbat mein tul ke

aariz ko gulon ki ranai bal zulf ko baKHshun sumbul ke

gulshan mein bahaar aae ki KHizan murjhae kali ya phul khilen

sayyaad tujhe kya matlab hai tu ashk gine ja bulbul ke

hum ahl-e-chaman ki nazron mein kuchh aur hi mana rakhta hai

kaliyon ka chaTak kar khil jaana phulon ka nikharna dhul dhul ke

wo chain to shayad rizwan ko jannat mein kya milta hoga

jo mujh ko sukun mil jata hai sae mein kisi ki kakul ke

ushshaq ke marne jine ko itni hi lagawaT kafi hai

ek choT si tirchhi nazron ke do chaar jhakole kakul ke

kaun us ki fazaon mein aa kar taKHrib ke shoale phunk gaya

aaKHir ye wahi to gulshan hai rahte the jahan hum mil-jul ke

is daur ke pagal insanon nafrat ki farawani kab tak

gar aaj nahin to kal tum ko rahna hi paDega mil-jul ke

gar had se siwa pi loge 'falak' phir hosh kahan mai-KHane ka

do-chaar hi qatre kafi hain pichhe na paDho jam-e-mul ke