aariz ashkon se tere tar nahin dekhe jate

aariz ashkoñ se tire tar nahīñ dekhe jaate

ḳhaak meñ rulte ye gauhar nahīñ dekhe jaate

dekh saktā huuñ zamāne kī badaltī nazreñ

tere badle hue tevar nahīñ dekhe jaate

aa.ina bhī ruḳh-e-raushan ke muqābil na rahe

ham se koī tire ham-sar nahīñ dekhe jaate

dil ke sāgar meñ jo har shām-o-sahar uThte haiñ

vo talātum kabhī bāhar nahīñ dekhe jaate

muskurāte hue chehre pe nazar sab kī paḌī

zaḳhm dil ke magar aksar nahīñ dekhe jaate

husn ke jalve jo dekhe tire dīvāne ne

hosh vāloñ se vo aksar nahīñ dekhe jaate

qadr kar qadr mire zauq-e-nazar kī saaqī

sab hasīñ yuuñ to mukarrar nahīñ dekhe jaate

mai-kadā apnā hai aur bāda-o-sāqī apne

ġhair ke haath meñ sāġhar nahīñ dekhe jaate

ye hasīñ vādī-o-dariyā gul-o-gulzār 'habīb'

bin tire mujh se ye manzar nahīñ dekhe jaate

aariz ashkon se tere tar nahin dekhe jate

KHak mein rulte ye gauhar nahin dekhe jate

dekh sakta hun zamane ki badalti nazren

tere badle hue tewar nahin dekhe jate

aaina bhi ruKH-e-raushan ke muqabil na rahe

hum se koi tere ham-sar nahin dekhe jate

dil ke sagar mein jo har sham-o-sahar uThte hain

wo talatum kabhi bahar nahin dekhe jate

muskuraate hue chehre pe nazar sab ki paDi

zaKHm dil ke magar aksar nahin dekhe jate

husn ke jalwe jo dekhe tere diwane ne

hosh walon se wo aksar nahin dekhe jate

qadr kar qadr mere zauq-e-nazar ki saqi

sab hasin yun to mukarrar nahin dekhe jate

mai-kada apna hai aur baada-o-saqi apne

ghair ke hath mein saghar nahin dekhe jate

ye hasin wadi-o-dariya gul-o-gulzar 'habib'

bin tere mujh se ye manzar nahin dekhe jate