aariz-e-shama pe nind aa gai parwanon ko

āriz-e-sham.a pe niiñd aa ga.ī parvānoñ ko

ḳhvāb se ab na jagā.e koī dīvānoñ ko

un ko mālūm hai rindoñ kī tamannā kyā hai

aks-e-ruḳh Daal ke bhar dete haiñ paimānoñ ko

ai dil-e-zār udhar chal ye tazabzub kyā hai

vo to āñkhoñ pe uThā lete haiñ mehmānoñ ko

ho ga.e saaf ayaañ rūh-o-badan ke nāsūr

raushnī maar ga.ī aaj ke insānoñ ko

un ke har chaak se tasvīr-e-vafā phūTegī

jashn-e-fardā meñ sajā.eñge garebānoñ ko

qalam-e-dār se tahrīr-e-rasan se ham ne

ik nayā moḌ diyā ishq ke afsānoñ ko

josh-e-dariyā ke qarā.in ye batāte haiñ 'zahīr'

mauj khā jā.egī sāhil ke shabistānoñ ko

aariz-e-shama pe nind aa gai parwanon ko

KHwab se ab na jagae koi diwanon ko

un ko malum hai rindon ki tamanna kya hai

aks-e-ruKH Dal ke bhar dete hain paimanon ko

ai dil-e-zar udhar chal ye tazabzub kya hai

wo to aankhon pe uTha lete hain mehmanon ko

ho gae saf ayan ruh-o-badan ke nasur

raushni mar gai aaj ke insanon ko

un ke har chaak se taswir-e-wafa phuTegi

jashn-e-farda mein sajaenge garebanon ko

qalam-e-dar se tahrir-e-rasan se hum ne

ek naya moD diya ishq ke afsanon ko

josh-e-dariya ke qarain ye batate hain 'zahir'

mauj kha jaegi sahil ke shabistanon ko