عارض کو گلاب لکھ رہا ہوں

عارض کو گلاب لکھ رہا ہوں

پانی کو سراب لکھ رہا ہوں

کچھ تو ہے مجھے کہ نام تیرا

ہر ریگ بر آب لکھ رہا ہوں

تجھ کو میں پرندۂ شفق گوں

دنیا کو عقاب لکھ رہا ہوں

ہر چند رفیق بے کسی ہیں

یادوں کو عذاب لکھ رہا ہوں

لے آج ترے حسیں بدن کو

دریائے چناب لکھ رہا ہوں

آ پھر مری لذتوں میں کھو جا

میں کار ثواب لکھ رہا ہوں

اس تیرہ و تار فاصلے کو

میں صرف نقاب لکھ رہا ہوں

برباد نہ کر حدیث دوراں

اے چشم پر آب لکھ رہا ہوں

لرزاں ہے قلم بہ سطح قرطاس

ہاں مست شباب لکھ رہا ہوں