aariz ko gulab likh raha hun

aariz ko gulāb likh rahā huuñ

paanī ko sarāb likh rahā huuñ

kuchh to hai mujhe ki naam terā

har reg-e-bar-āb likh rahā huuñ

tujh ko maiñ parinda-e-shafaq-gūñ

duniyā ko uqaab likh rahā huuñ

har chand rafīq-e-be-kasī haiñ

yādoñ ko azaab likh rahā huuñ

le aaj tire hasīñ badan ko

dariyā-e-chanāb likh rahā huuñ

aa phir mirī lazzatoñ meñ kho jā

maiñ kār-e-savāb likh rahā huuñ

is tīra-o-tār fāsle ko

maiñ sirf naqāb likh rahā huuñ

barbād na kar hadīs-e-daurāñ

ai chashm-e-pur-āb likh rahā huuñ

larzāñ hai qalam ba-sath-e-qirtās

haañ mast-e-shabāb likh rahā huuñ

aariz ko gulab likh raha hun

pani ko sarab likh raha hun

kuchh to hai mujhe ki nam tera

har reg-e-bar-ab likh raha hun

tujh ko main parinda-e-shafaq-gun

duniya ko uqab likh raha hun

har chand rafiq-e-be-kasi hain

yaadon ko azab likh raha hun

le aaj tere hasin badan ko

dariya-e-chanab likh raha hun

aa phir meri lazzaton mein kho ja

main kar-e-sawab likh raha hun

is tira-o-tar fasle ko

main sirf naqab likh raha hun

barbaad na kar hadis-e-dauran

ai chashm-e-pur-ab likh raha hun

larzan hai qalam ba-sath-e-qirtas

han mast-e-shabab likh raha hun