aarzu aur hawas ka hissa hun

aarzū aur havas kā hissa huuñ

jism kī lazzatoñ kā qissa huuñ

ek kunj-e-farār meñ mahfūz

pas-e-dīvār huuñ maiñ saaya huuñ

shab-gazīda idhar se guzreñge

kārvān-e-sahar kā jaada huuñ

hairatī maiñ ki merā ā.īna

jism huuñ yā ki raqs-e-bāda yuuñ

merī tanhā.ī mujh se kahtī hai

naqsh-e-kohna pe naqsh-e-tāza huuñ

kaif-o-kam ke shumār kyā ma.anī

maiñ to manzar huuñ maiñ to diida huuñ

mujh ko mat chaak kar ki apne ta.iiñ

nāma-e-dost huuñ maiñ girya huuñ

maiñ ulūm-e-zamāñ kā shahzāda

maiñ zamīñ-zād ibn-e-sīnā huuñ

matn-o-qārī ke darmiyāñ meñ kyā

maiñ faqat lafz huuñ ki ma.anā hoñ

aarzu aur hawas ka hissa hun

jism ki lazzaton ka qissa hun

ek kunj-e-farar mein mahfuz

pas-e-diwar hun main saya hun

shab-gazida idhar se guzrenge

karwan-e-sahar ka jada hun

hairati main ki mera aaina

jism hun ya ki raqs-e-baada yun

meri tanhai mujh se kahti hai

naqsh-e-kohna pe naqsh-e-taza hun

kaif-o-kam ke shumar kya mani

main to manzar hun main to dida hun

mujh ko mat chaak kar ki apne tain

nama-e-dost hun main girya hun

main ulum-e-zaman ka shahzada

main zamin-zad ibn-e-sina hun

matn-o-qari ke darmiyan mein kya

main faqat lafz hun ki mana hon