aarzu-e-dil-e-nakaam se Dar lagta hai

ārzū-e-dil-e-nākām se Dar lagtā hai

zindagānī tire paiġhām se Dar lagtā hai

phir kisī jazba-e-gum-nām se Dar lagtā hai

husn-e-ma.asūm pe ilzām se Dar lagtā hai

shīsha-e-dil pe koī Thes na lagne paa.e

talḳhi-e-mai se nahīñ jaam se Dar lagtā hai

jis ko āġhāz-e-mohabbat kā nahīñ hai ehsās

bas use ishq ke anjām se Dar lagtā hai

vaqt ke saath badal jaatī haiñ qadreñ hamdam

rāh-e-pur-ḳhār meñ ārām se Dar lagtā hai

jis ne tūfān-e-balā-ḳhez kā muñh toḌ diyā

kyuuñ use gardish-e-ayyām se Dar lagtā hai

dekh kar qasr-e-tamannā kī tabāhī shāyad

gulshan-e-dil ke dar-o-bām se Dar lagtā hai

mehr-e-tābāñ kī qasam gesū-e-jānāñ kī qasam

sub.h-e-nau tujh se nahīñ shaam se Dar lagtā hai

sirf allāh se Dartī hai 'azīz'-e-ḳhasta

kyā use talḳhī-e-ayyām se Dar lagtā hai

aarzu-e-dil-e-nakaam se Dar lagta hai

zindagani tere paigham se Dar lagta hai

phir kisi jazba-e-gum-nam se Dar lagta hai

husn-e-masum pe ilzam se Dar lagta hai

shisha-e-dil pe koi Thes na lagne pae

talKHi-e-mai se nahin jam se Dar lagta hai

jis ko aaghaz-e-mohabbat ka nahin hai ehsas

bas use ishq ke anjam se Dar lagta hai

waqt ke sath badal jati hain qadren hamdam

rah-e-pur-KHar mein aaram se Dar lagta hai

jis ne tufan-e-bala-KHez ka munh toD diya

kyun use gardish-e-ayyam se Dar lagta hai

dekh kar qasr-e-tamanna ki tabahi shayad

gulshan-e-dil ke dar-o-baam se Dar lagta hai

mehr-e-taban ki qasam gesu-e-jaanan ki qasam

subh-e-nau tujh se nahin sham se Dar lagta hai

sirf allah se Darti hai 'aziz'-e-KHasta

kya use talKHi-e-ayyam se Dar lagta hai