aarzu hai na koi hasrat hai

aarzū hai na koī hasrat hai

yaad hī us kī ab ġhanīmat hai

ġham kī daulat hī merī daulat hai

is meñ bhī mujh ko ain rāhat hai

dekhiye kaun kāmrāñ nikle

maiñ huuñ yā ab merī musībat hai

kyoñ pashemāñ ho dil gunāhoñ par

us kī baḳhshish hai us kī rahmat hai

us se kyā ho mujhe umīd-e-vafā

bevafā.ī hī jis kī aadat hai

ġham meñ masrūr dard meñ shādāñ

dil kī fitrat ajiib fitrat hai

har zabāñ par hai ab hamārā naam

ai mohabbat tirī ināyat hai

ho chukī intihā jafāoñ kī

ab tire lutf kī zarūrat hai

gulistānoñ kā hai maqām apnā

ḳhārzāroñ kī apnī azmat hai

ġham na ho to hai zindagī be-kaif

ġham hī se zindagī ibārat hai

din bahāroñ ke bhī na raas aa.e

mere ḳhāliq ye merī qismat hai

shorisheñ ḳhatm haiñ shabāb ke saath

ab vo dil hai na vo tabī.at hai

maut se log kyoñ hirāsāñ haiñ

zindagī bhī to ik musībat hai

koī begāna ho ki apnā ho

har kisī se hameñ mohabbat hai

ġham se bezār kis liye ho 'kañval'

ġham hī se aadmī kī izzat hai

aarzu hai na koi hasrat hai

yaad hi us ki ab ghanimat hai

gham ki daulat hi meri daulat hai

is mein bhi mujh ko ain rahat hai

dekhiye kaun kaamran nikle

main hun ya ab meri musibat hai

kyon pasheman ho dil gunahon par

us ki baKHshish hai us ki rahmat hai

us se kya ho mujhe umid-e-wafa

bewafai hi jis ki aadat hai

gham mein masrur dard mein shadan

dil ki fitrat ajib fitrat hai

har zaban par hai ab hamara nam

ai mohabbat teri inayat hai

ho chuki intiha jafaon ki

ab tere lutf ki zarurat hai

gulistanon ka hai maqam apna

KHarzaron ki apni azmat hai

gham na ho to hai zindagi be-kaif

gham hi se zindagi ibarat hai

din bahaaron ke bhi na ras aae

mere KHaliq ye meri qismat hai

shorishen KHatm hain shabab ke sath

ab wo dil hai na wo tabiat hai

maut se log kyon hirasan hain

zindagi bhi to ek musibat hai

koi begana ho ki apna ho

har kisi se hamein mohabbat hai

gham se bezar kis liye ho 'kanwal'

gham hi se aadmi ki izzat hai