aarzu jin ki hai unki anjuman tak aa gae

aarzū jin kī hai un kī anjuman tak aa ga.e

nik.hat-e-gul ke sahāre ham chaman tak aa ga.e

be-ruḳhī se aap jab begāna-pan tak aa ga.e

aaj ham bhī jur.at-e-jurm-e-suḳhan tak aa ga.e

mai-kada phir bhī ġhanīmat hai jahāñ is daur meñ

ek hī markaz pe shaiḳh-o-barhaman tak aa ga.e

jal bujhe ahl-e-junūñ lekin kisī ko kyā ḳhabar

kitne sho'le ḳhud usī gul-pairahan tak aa ga.e

mo'atabar ho kar rahī dīvāngī apnī 'surūr'

jitne andāz-e-junūñ the bāñkpan tak aa ga.e

aarzu jin ki hai un ki anjuman tak aa gae

nikhat-e-gul ke sahaare hum chaman tak aa gae

be-ruKHi se aap jab begana-pan tak aa gae

aaj hum bhi jurat-e-jurm-e-suKHan tak aa gae

mai-kada phir bhi ghanimat hai jahan is daur mein

ek hi markaz pe shaiKH-o-barhaman tak aa gae

jal bujhe ahl-e-junun lekin kisi ko kya KHabar

kitne sho'le KHud usi gul-pairahan tak aa gae

mo'atabar ho kar rahi diwangi apni 'surur'

jitne andaz-e-junun the bankpan tak aa gae