aarzu miT na saki umr basar hone tak

aarzū miT na sakī 'umr basar hone tak

sham' jaltī rahī bujh bujh ke sahar hone tak

'ālim-e-shāḳh-o-gul-o-barg-e-chaman se pūchho

ek daane pe jo guzrī hai samar hone tak

sabr kahtā hai ki ab nāloñ ko ruḳhsat diije

zabt kahtā hai karo sabr asar hone tak

TimTimātā hai sar-e-shām hī se dil kā charāġh

jaane kyā hogā shab-e-ġham kī sahar hone tak

kashtī-e-'aql salāmat hai yam-e-hastī meñ

mauja-e-dard-e-mohabbat ke guzar hone tak

merī hastī kā har ik naqsh thā phīkā phīkā

'ishq meñ ḳhūn-e-dil-o-ḳhūn-e-jigar hone tak

kitne tāroñ ne sahar shab ko banānā chāhā

ḳhud magar Duub ga.e nūr-e-sahar hone tak

ġhuncha khilne ko hai muhtāj-e-shu'ā'-e-ḳhurshīd

dil na parvān chaḌhā un kī nazar hone tak

jaane kitne hī abhī hashr uTheñge 'rā’nā'

ḳhaak ke zarroñ ke ḳhurshīd-o-qamar hone tak

aarzu miT na saki 'umr basar hone tak

sham' jalti rahi bujh bujh ke sahar hone tak

'alim-e-shaKH-o-gul-o-barg-e-chaman se puchho

ek dane pe jo guzri hai samar hone tak

sabr kahta hai ki ab nalon ko ruKHsat dije

zabt kahta hai karo sabr asar hone tak

TimTimata hai sar-e-sham hi se dil ka charagh

jaane kya hoga shab-e-gham ki sahar hone tak

kashti-e-'aql salamat hai yam-e-hasti mein

mauja-e-dard-e-mohabbat ke guzar hone tak

meri hasti ka har ek naqsh tha phika phika

'ishq mein KHun-e-dil-o-KHun-e-jigar hone tak

kitne taron ne sahar shab ko banana chaha

KHud magar Dub gae nur-e-sahar hone tak

ghuncha khilne ko hai muhtaj-e-shu'a'-e-KHurshid

dil na parwan chaDha un ki nazar hone tak

jaane kitne hi abhi hashr uThenge 'ra’na'

KHak ke zarron ke KHurshid-o-qamar hone tak