aarzu ne jis ki poron tak tha sahlaya mujhe

aarzū ne jis kī poroñ tak thā sahlāyā mujhe

ḳhaak āḳhir kar gayā us chāñd kā saaya mujhe

ghup-añdhere meñ bhī us kā jism thā chāñdī kā shahr

chāñd jab niklā to vo sonā nazar aayā mujhe

aañkh par tinkoñ kī chilman hoñT par lohe kā qufl

ai dil-e-be-ḳhānamāñ kis ghar meñ le aayā mujhe

kis qadar thā mutma.in maiñ peḌ ke sā.e-tale

chāñdnī mujh par chhiḌak kar tū ne bahkāyā mujhe

maiñ bisāt-e-gul ko tarsā umr bhar 'anvar-sadīd'

aaj phūloñ par luTā kar kyuuñ hai taḌpāyā mujhe

aarzu ne jis ki poron tak tha sahlaya mujhe

KHak aaKHir kar gaya us chand ka saya mujhe

ghup-andhere mein bhi us ka jism tha chandi ka shahr

chand jab nikla to wo sona nazar aaya mujhe

aankh par tinkon ki chilman honT par lohe ka qufl

ai dil-e-be-KHanaman kis ghar mein le aaya mujhe

kis qadar tha mutmain main peD ke sae-tale

chandni mujh par chhiDak kar tu ne bahkaya mujhe

main bisat-e-gul ko tarsa umr bhar 'anwar-sadid'

aaj phulon par luTa kar kyun hai taDpaya mujhe