aarzu tadbir ho kar rah gai

aarzū tadbīr ho kar rah ga.ī

justujū tāḳhīr ho kar rah ga.ī

sard sannāTā musallat ho gayā

be-hisī zanjīr ho kar rah ga.ī

soch kī āvāz kitnī tez hai

ḳhāmushī taqrīr ho kar rah ga.ī

jab bhī kī tahrīr apnī dāstāñ

terī hī tasvīr ho kar rah ga.ī

kaaT hai alfāz kī kitnī shadīd

guftugū shamshīr ho kar rah ga.ī

aah ye din rain kī bechain soch

jo mirī taqdīr ho kar rah ga.ī

said-e-taḳhrīb-e-ḳhirad hai zindagī

hasrat-e-tāmīr ho kar rah ga.ī

harf-e-sanjīda thī rūdād-e-ḳhirad

kitnī be-tāsīr ho kar rah ga.ī

ahd-e-hāzir kī kitābī shā.irī

fikr kī jāgīr ho kar rah ga.ī

mere fikr-o-fan kī azmat āḳhirash

shoḳhi-e-tahrīr ho kar rah ga.ī

'kirshn' mohan ḳhvāb kī tābīr bhī

dard kī tafsīr ho kar rah ga.ī

aarzu tadbir ho kar rah gai

justuju taKHir ho kar rah gai

sard sannaTa musallat ho gaya

be-hisi zanjir ho kar rah gai

soch ki aawaz kitni tez hai

KHamushi taqrir ho kar rah gai

jab bhi ki tahrir apni dastan

teri hi taswir ho kar rah gai

kaT hai alfaz ki kitni shadid

guftugu shamshir ho kar rah gai

aah ye din rain ki bechain soch

jo meri taqdir ho kar rah gai

said-e-taKHrib-e-KHirad hai zindagi

hasrat-e-tamir ho kar rah gai

harf-e-sanjida thi rudad-e-KHirad

kitni be-tasir ho kar rah gai

ahd-e-hazir ki kitabi shairi

fikr ki jagir ho kar rah gai

mere fikr-o-fan ki azmat aaKHirash

shoKHi-e-tahrir ho kar rah gai

'kirshn' mohan KHwab ki tabir bhi

dard ki tafsir ho kar rah gai