aarzuen jal gain shauq-e-farawan jal gaya

ārzūeñ jal ga.iiñ shauq-e-farāvāñ jal gayā

bujh gayā dil zindagī kā sāz-o-sāmāñ jal gayā

mausam-e-gul thā ki thī barq-e-ḳhizāñ zer-e-naqāb

phuul hañsne bhī na paa.e the gulistāñ jal gayā

shauq-e-manzil meñ junūñ kī garm-raftārī na pūchh

raah ke kāñToñ kī kyā hastī bayābāñ jal gayā

jhuum kar sū-e-chaman aayā to kyā barsā to kyā

āshiyāñ to kab kā ai abr-e-bahārāñ jal gayā

hashr ke din rahmat-e-haq ne liyā āġhosh meñ

zauq-e-isyāñ par mire zāhid kā īmāñ jal gayā

dekh 'qaisar' ye hai gulshan meñ ma.āl-e-fasl-e-gul

ġhunche ġhunche kā gulistāñ meñ garebāñ jal gayā

aarzuen jal gain shauq-e-farawan jal gaya

bujh gaya dil zindagi ka saz-o-saman jal gaya

mausam-e-gul tha ki thi barq-e-KHizan zer-e-naqab

phul hansne bhi na pae the gulistan jal gaya

shauq-e-manzil mein junun ki garm-raftari na puchh

rah ke kanTon ki kya hasti bayaban jal gaya

jhum kar su-e-chaman aaya to kya barsa to kya

aashiyan to kab ka ai abr-e-bahaaran jal gaya

hashr ke din rahmat-e-haq ne liya aaghosh mein

zauq-e-isyan par mere zahid ka iman jal gaya

dekh 'qaisar' ye hai gulshan mein maal-e-fasl-e-gul

ghunche ghunche ka gulistan mein gareban jal gaya