aarzuen nazr-e-dauran nazr-e-jaanan ho gain

ārzūeñ nazr-e-daurāñ nazr-e-jānāñ ho ga.iiñ

kyā bahāreñ thiiñ jo do phūloñ pe qurbāñ ho ga.iiñ

ġham kī shīrīñ talḳhiyāñ jiine kā sāmāñ ho ga.iiñ

bijliyāñ ḳhūn-e-rag-e-jān-e-gulistāñ ho ga.iiñ

rūh-e-ġham rūh-e-tarab rūh-e-ajal rūh-e-hayāt

jab ye bāham mil ga.iiñ taqdīr-e-insāñ ho ga.iiñ

yaad hai un kī ki ik mauj-e-jamāl-o-rañg-o-bū

sham'eñ kaliyoñ kī sī us dil meñ farozāñ ho ga.iiñ

āñsuoñ ke zabt se betābī-e-dil baḌh ga.ī

is tarah simTīñ ye būñdeñ ek tūfāñ ho ga.iiñ

ek vo haiñ jin ke vīrāne bane haiñ bastiyāñ

ek ham haiñ bastiyāñ bhī jin kī vīrāñ ho ga.iiñ

un kā jalva dekhte hī uḌ ga.e hosh-o-havās

kashtiyāñ sāhil se lag kar nazr-e-tūfāñ ho ga.iiñ

hādsoñ ne kar diyā paidā ḳhayāl-e-hifz-e-jāñ

bijliyāñ hī vaj.h-e-tanzīm-e-gulistāñ ho ga.iiñ

chhaT ga.iiñ 'ra.anā' ḳhunuk aahoñ se ġham kī zulmateñ

badliyāñ ThanDī havāoñ se pareshāñ ho ga.iiñ

aarzuen nazr-e-dauran nazr-e-jaanan ho gain

kya bahaaren thin jo do phulon pe qurban ho gain

gham ki shirin talKHiyan jine ka saman ho gain

bijliyan KHun-e-rag-e-jaan-e-gulistan ho gain

ruh-e-gham ruh-e-tarab ruh-e-ajal ruh-e-hayat

jab ye baham mil gain taqdir-e-insan ho gain

yaad hai un ki ki ek mauj-e-jamal-o-rang-o-bu

sham'en kaliyon ki si us dil mein farozan ho gain

aansuon ke zabt se betabi-e-dil baDh gai

is tarah simTin ye bunden ek tufan ho gain

ek wo hain jin ke virane bane hain bastiyan

ek hum hain bastiyan bhi jin ki viran ho gain

un ka jalwa dekhte hi uD gae hosh-o-hawas

kashtiyan sahil se lag kar nazr-e-tufan ho gain

hadson ne kar diya paida KHayal-e-hifz-e-jaan

bijliyan hi wajh-e-tanzim-e-gulistan ho gain

chhaT gain 'rana' KHunuk aahon se gham ki zulmaten

badliyan ThanDi hawaon se pareshan ho gain