آرزوؤں کا سلسلہ کیا ہے

آرزوؤں کا سلسلہ کیا ہے

بے سبب اس کو سوچتا کیا ہے

گرم جوشی نہ جس میں شامل ہو

اس تعلق کا فائدہ کیا ہے

کرچیوں میں بکھر چکا ہوں میں

اب علاج غم وفا کیا ہے

جب محبت عذاب جاں ٹھہری

اس سے بچنے کا راستہ کیا ہے

غم کی پرچھائیاں نہ ہوں رخ پر

لوگ پوچھیں گے ماجرا کیا ہے

قتل کرتے ہو اپنی نظروں سے

تم ہی بتلاؤ خوں بہا کیا ہے

بس تقرب بدن کا ہے درکار

ورنہ آنکھوں کا رابطہ کیا ہے

عزم محکم اگر ہو اجملؔ پھر

اپنے پیروں کا آبلہ کیا ہے