aarzuon ko ana-gir nahin kar sakte

ārzūoñ ko anā-gīr nahīñ kar sakte

ḳhvāb ko paaoñ kī zanjīr nahīñ kar sakte

kyā sitam hai kī muqaddar meñ likhā hai sab kuchh

phir bhī ham shikva-e-taqdīr nahīñ kar sakte

jab bulā.egī hameñ maut chale jā.eñge

hukm aisā hai kī tāḳhīr nahīñ kar sakte

ye safar vo hai kī jo chhūT gayā chhūT gayā

phir use paane kī tadbīr nahīñ kar sakte

jañg meñ kaise Tikeñge vo bhalā hastī kī

jo kisī shāḳh ko shamshīr nahīñ kar sakte

aap to ḳhair baḌe aadmī kahlāte haiñ

ham to chhoToñ kī bhī tahqīr nahīñ kar sakte

sab pe pābandī usūloñ kī 'siyā' lāzim hai

suḳhan-o-sher ko jāgīr nahīñ kar sakte

aarzuon ko ana-gir nahin kar sakte

KHwab ko paon ki zanjir nahin kar sakte

kya sitam hai ki muqaddar mein likha hai sab kuchh

phir bhi hum shikwa-e-taqdir nahin kar sakte

jab bulaegi hamein maut chale jaenge

hukm aisa hai ki taKHir nahin kar sakte

ye safar wo hai ki jo chhuT gaya chhuT gaya

phir use pane ki tadbir nahin kar sakte

jang mein kaise Tikenge wo bhala hasti ki

jo kisi shaKH ko shamshir nahin kar sakte

aap to KHair baDe aadmi kahlate hain

hum to chhoTon ki bhi tahqir nahin kar sakte

sab pe pabandi usulon ki 'siya' lazim hai

suKHan-o-sher ko jagir nahin kar sakte