aas bhi TuTi nahin hai waswasa bhi kam nahin

aas bhī TuuTī nahīñ hai vasvasa bhī kam nahīñ

haañ magar ab iztirāb-e-dil kā vo 'ālam nahīñ

dene vaale shukriya vaise to ye bhī kam nahīñ

maiñ ne māñgā thā samundar qatra-e-shabnam nahīñ

jitnī miltī hai suhūlat utnī baḌhtī hai talab

mutma.in ho jaa.e hargiz fitrat-e-ādam nahīñ

kaise lauTeñge bhalā ham apnī maazī kī taraf

dil meñ ab jazba nahīñ hai haath meñ parcham nahīñ

lāzim-o-malzūm haiñ ek dūsre ke vāste

ham nahīñ to tum nahīñ jo tum nahīñ to ham nahīñ

dhīre dhīre zaḳhm bharte jā.eñge hālāt ke

vaqt se behtar 'azīzo koī bhī marham nahīñ

'umr bhar ronā paḌegā dil lagāoge agar

'ishq aisā zaḳhm hai jis kā koī marham nahīñ

tum ne koshish hī nahīñ kī ābyārī ke liye

ye shikāyat mat karo miTTī hamārī nam nahīñ

tum namak-pāshī karoge to maza aa jā.egā

zaḳhm vo rakhtā huuñ jo minnat-kash-e-marham nahīñ

muddatoñ royā kareñge yaad kar kar ke 'shakīl'

bhuul jā.eñge hameñ ahbāb aise ham nahīñ

aas bhi TuTi nahin hai waswasa bhi kam nahin

han magar ab iztirab-e-dil ka wo 'alam nahin

dene wale shukriya waise to ye bhi kam nahin

main ne manga tha samundar qatra-e-shabnam nahin

jitni milti hai suhulat utni baDhti hai talab

mutmain ho jae hargiz fitrat-e-adam nahin

kaise lauTenge bhala hum apni mazi ki taraf

dil mein ab jazba nahin hai hath mein parcham nahin

lazim-o-malzum hain ek dusre ke waste

hum nahin to tum nahin jo tum nahin to hum nahin

dhire dhire zaKHm bharte jaenge haalat ke

waqt se behtar 'azizo koi bhi marham nahin

'umr bhar rona paDega dil lagaoge agar

'ishq aisa zaKHm hai jis ka koi marham nahin

tum ne koshish hi nahin ki aabyari ke liye

ye shikayat mat karo miTTi hamari nam nahin

tum namak-pashi karoge to maza aa jaega

zaKHm wo rakhta hun jo minnat-kash-e-marham nahin

muddaton roya karenge yaad kar kar ke 'shakil'

bhul jaenge hamein ahbab aise hum nahin