aasan har ek baat ko dushwar karo tum

āsān har ik baat ko dushvār karo tum

iqrār jahāñ maiñ karūñ inkār karo tum

jab beach bhañvar ziist kī kashtī kabhī Duube

mallāh bano aur mujhe patvār karo tum

dāman pe mohabbat kā koī daaġh lagā kar

phir pesh-e-zamāna mujhe lāchār karo tum

zanjīr-e-mohabbat yūñhī pairoñ meñ sajā kar

vahshat kā tamāshā mirī har baar karo tum

har baat pe Thahrā ke mujhe morid-e-ilzām

īsār-o-vafā ko mire be-kār karo tum

ye zo.am-e-ḳhudī hai ki tamāshā-e-ḳhudī hai

sar bech ke nāmūs ko dastār karo tum

aasan har ek baat ko dushwar karo tum

iqrar jahan main karun inkar karo tum

jab beach bhanwar zist ki kashti kabhi Dube

mallah bano aur mujhe patwar karo tum

daman pe mohabbat ka koi dagh laga kar

phir pesh-e-zamana mujhe lachaar karo tum

zanjir-e-mohabbat yunhi pairon mein saja kar

wahshat ka tamasha meri har bar karo tum

har baat pe Thahra ke mujhe morid-e-ilzam

isar-o-wafa ko mere be-kar karo tum

ye zoam-e-KHudi hai ki tamasha-e-KHudi hai

sar bech ke namus ko dastar karo tum