aasan nahin hai tanha dar us ka baz karna

āsāñ nahīñ hai tanhā dar us kā baaz karnā

lāzim hai pāsbāñ se ab ham ko saaz karnā

gar ham mushīr hote allāh ke to kahte

yaanī visāl kī shab yā rab darāz karnā

us kā salām mujh se ab kyā hai gardish-e-rau

tiflī meñ maiñ sikhāyā jis ko namāz karnā

az-bas-ki ḳhuun dil kā khātā hai josh har dam

mushkil huā hai ham ko iḳhfā-e-rāz karnā

bā-yak-niyāz us se kyūñkar koī bar aave

aatā ho sau tarah se jis ko ki naaz karnā

karte haiñ choT āḳhir ye āhuān-e-badmast

āñkhoñ se us kī ai dil Tuk ehtirāz karnā

ai aah us ke dil meñ tāsīr ho to jānūñ

hai varna kaam kitnā patthar gudāz karnā

hovegī sub.h raushan ik dam meñ vasl kī shab

band-e-qabā ko apne zālim na baaz karnā

ai 'mus.hafī' haiñ do chiiz ab yād-gār-e-daurāñ

us se tū naaz karnā mujh se niyāz karnā

aasan nahin hai tanha dar us ka baz karna

lazim hai pasban se ab hum ko saz karna

gar hum mushir hote allah ke to kahte

yani visal ki shab ya rab daraaz karna

us ka salam mujh se ab kya hai gardish-e-rau

tifli mein main sikhaya jis ko namaz karna

az-bas-ki KHun dil ka khata hai josh har dam

mushkil hua hai hum ko iKHfa-e-raaz karna

ba-yak-niyaz us se kyunkar koi bar aawe

aata ho sau tarah se jis ko ki naz karna

karte hain choT aaKHir ye aahuan-e-badmast

aankhon se us ki ai dil Tuk ehtiraaz karna

ai aah us ke dil mein tasir ho to jaanun

hai warna kaam kitna patthar gudaz karna

howegi subh raushan ek dam mein wasl ki shab

band-e-qaba ko apne zalim na baz karna

ai 'mushafi' hain do chiz ab yaad-gar-e-dauran

us se tu naz karna mujh se niyaz karna