aasan to na tha dhup mein sahra ka safar kuchh

āsāñ to na thā dhuup meñ sahrā kā safar kuchh

bā-faiz magar milte rahe mujh ko shajar kuchh

pursish na karo mujh se marā haal na pūchho

ukhḌā sā zarā rahtā hai jī merā idhar kuchh

sailāb na ho to na ho dil meñ bhī talātum

paanī to rahe Duub ke marne ko magar kuchh

itnā hī ġhanī hai jo samundar to kaho vo

sāhil pe bahā laa.e kabhī la.al-o-guhar kuchh

nāzil hai jo ye ujlā sā añdherā sā fazā par

mumkin hai ki is shab meñ ho paivast sahar kuchh

āvāz bhī lahrā.ī thī halchal bhī huī thī

ik pal ko to kuchh ubhrā thā aayā thā nazar kuchh

shānoñ kā ye ḳham tujh meñ na.ī baat hai 'saurabh'

ā.īna kabhī dekho rakho apnī ḳhabar kuchh

aasan to na tha dhup mein sahra ka safar kuchh

ba-faiz magar milte rahe mujh ko shajar kuchh

pursish na karo mujh se mara haal na puchho

ukhDa sa zara rahta hai ji mera idhar kuchh

sailab na ho to na ho dil mein bhi talatum

pani to rahe Dub ke marne ko magar kuchh

itna hi ghani hai jo samundar to kaho wo

sahil pe baha lae kabhi lal-o-guhar kuchh

nazil hai jo ye ujla sa andhera sa faza par

mumkin hai ki is shab mein ho paiwast sahar kuchh

aawaz bhi lahrai thi halchal bhi hui thi

ek pal ko to kuchh ubhra tha aaya tha nazar kuchh

shanon ka ye KHam tujh mein nai baat hai 'saurabh'

aaina kabhi dekho rakho apni KHabar kuchh