آسان زندگانی کا کوئی سفر نہیں

آسان زندگانی کا کوئی سفر نہیں

منزل ہے راستہ ہے مگر راہبر نہیں

جس کے خیال و خواب میں دنیا سے کٹ گیا

اس کو مرے وجود کی کوئی خبر نہیں

رعنائی جمال ہے موضوع گفتگو

حالات حاضرہ پہ تمہاری نظر نہیں

یہ رقص تیرگی ہے یا معراج زندگی

محفوظ کوئی گاؤں کوئی رہگزر نہیں

یہ روز و شب کی ساری تگ و دو فضول ہے

گر زندگی کے باب میں سوز جگر نہیں

گوہر شناس بزم سے شاید کہ جا چکے

کیوں آج کوئی قیمت دست ہنر نہیں

جس کو ہر ایک شخص ہی نا معتبر لگے

اجملؔ مری نگاہ میں وہ معتبر نہیں