آثار زندگی کے نمایاں ہوئے تو ہیں

آثار زندگی کے نمایاں ہوئے تو ہیں

مانا دہان زخم ہیں خنداں ہوئے تو ہیں

تعبیریں دیکھ دیکھ کے حیراں ہوئے تو ہیں

کچھ خواب ساز آج پریشاں ہوئے تو ہیں

اے دل چلو کہ مل کے مدارات غم کریں

یادوں کے انجم آج درخشاں ہوئے تو ہیں

اب اپنی حسرتوں کو بسائیں گے ہم وہیں

کچھ شہر آرزو ابھی ویراں ہوئے تو ہیں

بجنے لگیں گی ساز پہ زنجیریں خود بخود

دیوانے ان کی زلف کے رقصاں ہوئے تو ہیں

باقی ہے دل پر آج بھی قرض نگاہ یار

دامن ہزار بار گریباں ہوئے تو ہیں

ماتم کدے میں ساز شکستہ لئے ہوئے

کچھ اہل درد ہیں جو غزل خواں ہوئے تو ہیں