aaseb bas gaya koi aa kar makan mein

aaseb bas gayā koī aa kar makān meñ

ik naam letā rahtā hai har vaqt kaan meñ

mujh ko shigāf karnā paḌā āsmān meñ

koī ḳhalā jab hone lagā darmiyān meñ

dīvār meñ darār to aanī thī ek din

sar kab talak paTaḳhtī ḳhamoshī makān meñ

vo karb-e-ibtisām na tafhīm kar sakā

ehsās kī kamī thī mire tarjumān meñ

kuchh is sabab bhī dard kā ehsās thā ziyāñ

gard-e-safar hī rah ga.ī hāsil thakān meñ

kal shab shab-e-firāq kī mahrūmiyāñ na pūchh

tamhīd-e-hijr bhī rahī shāmil azaan meñ

chīḳhoñ se jaag uTThe ka.ī munjamid bhañvar

koī duā thamī sī rahī āsmān meñ

muddat se ḳhud-kalāmī hai 'tārā' bhī kyā kareñ

jaale se jaise paḌne lage haiñ zabān meñ

aaseb bas gaya koi aa kar makan mein

ek nam leta rahta hai har waqt kan mein

mujh ko shigaf karna paDa aasman mein

koi KHala jab hone laga darmiyan mein

diwar mein darar to aani thi ek din

sar kab talak paTaKHti KHamoshi makan mein

wo karb-e-ibtisam na tafhim kar saka

ehsas ki kami thi mere tarjuman mein

kuchh is sabab bhi dard ka ehsas tha ziyan

gard-e-safar hi rah gai hasil thakan mein

kal shab shab-e-firaq ki mahrumiyan na puchh

tamhid-e-hijr bhi rahi shamil azan mein

chiKHon se jag uTThe kai munjamid bhanwar

koi dua thami si rahi aasman mein

muddat se KHud-kalami hai 'tara' bhi kya karen

jale se jaise paDne lage hain zaban mein