aaseb-sifat ye meri tanhai ajab hai

āseb-sifat ye mirī tanhā.ī 'ajab hai

har samt tirī yaad kī shahnā.ī 'ajab hai

ik bichhḌe shanāsā se mulāqāt ke bā-vasf

bikhre hue lamhoñ kī shakebā.ī 'ajab hai

ab silsila-e-ranj-o-mehan TuuT bhī jaa.e

is baar to kuchh tarz-e-pazīrā.ī 'ajab hai

ab mujh pe khulā apne dar-o-bām kā afsūñ

yuuñ hai ki mire ghar kī ye tanhā.ī 'ajab hai

sūraj se utarte haiñ mire har-bun-e-mū par

āñkheñ bhī rakhūñ band to bīnā.ī 'ajab hai

har din sitam-ījād hai har raat siyah-fām

yārab ye tirī anjuman-ārā.ī 'ajab hai

pighlā huā sonā thī jo dīvār-o-saqaf par

vo dhuup ghaḌī bhar meñ hī kajlā.ī 'ajab hai

nas nas meñ phisaltā hai tire qurb kā nashsha

har mauja-e-ḳhūñ-nāb kī gahrā.ī 'ajab hai

aaseb-sifat ye meri tanhai 'ajab hai

har samt teri yaad ki shahnai 'ajab hai

ek bichhDe shanasa se mulaqat ke ba-wasf

bikhre hue lamhon ki shakebai 'ajab hai

ab silsila-e-ranj-o-mehan TuT bhi jae

is bar to kuchh tarz-e-pazirai 'ajab hai

ab mujh pe khula apne dar-o-baam ka afsun

yun hai ki mere ghar ki ye tanhai 'ajab hai

suraj se utarte hain mere har-bun-e-mu par

aankhen bhi rakhun band to binai 'ajab hai

har din sitam-ijad hai har raat siyah-fam

yarab ye teri anjuman-arai 'ajab hai

pighla hua sona thi jo diwar-o-saqaf par

wo dhup ghaDi bhar mein hi kajlai 'ajab hai

nas nas mein phisalta hai tere qurb ka nashsha

har mauja-e-KHun-nab ki gahrai 'ajab hai