aashiq-e-soKHta-dil KHatt-e-sanam donon ek

āshiq-e-soḳhta-dil ḳhatt-e-sanam donoñ ek

jis tarah suniye judā shādī-o-ġham donoñ ek

donoñ bātin meñ agar ek haiñ lekin koī

āb-o-ātish nahīñ rakhtā hai baham donoñ ek

hai judā sajde kī jā hindū musalmāñ kī magar

fahm vāloñ ke ta.iiñ dair-o-haram donoñ ek

kuhl karte haiñ ham āñkhoñ meñ barābar dono

surma-e-kor ko aur ḳhāk-e-qadam donoñ ek

jab phañsā zulf meñ jā dil na rahā nañg-o-hayā

taaq par rakhiye vahāñ nañg-o-sharam donoñ ek

bār-e-ġham hijr paḌā sar pe kisī ke us dam

ḳhaak meñ diije milā aql-o-faham donoñ ek

evaz-e-hijr na luuñ aish tamām aalam kā

hai azal se mujhe farmān-e-hakam donoñ ek

dil meñ armāñ na rahā baaqī jo chāhā so kiyā

sair duniyā kī bhī aur sair-e-adam donoñ ek

yaar āġhosh meñ apne hai muhayyā har-dam

bas hai ye mere ta.iiñ jāh-o-hasham donoñ ek

aarzū 'qāsim-alī' dil meñ nahīñ kuchh lekin

chāhiye apne ta.iiñ fazl-o-karam donoñ ek

aashiq-e-soKHta-dil KHatt-e-sanam donon ek

jis tarah suniye juda shadi-o-gham donon ek

donon baatin mein agar ek hain lekin koi

aab-o-atish nahin rakhta hai baham donon ek

hai juda sajde ki ja hindu musalman ki magar

fahm walon ke tain dair-o-haram donon ek

kuhl karte hain hum aankhon mein barabar dono

surma-e-kor ko aur KHak-e-qadam donon ek

jab phansa zulf mein ja dil na raha nang-o-haya

taq par rakhiye wahan nang-o-sharam donon ek

bar-e-gham hijr paDa sar pe kisi ke us dam

KHak mein dije mila aql-o-faham donon ek

ewaz-e-hijr na lun aish tamam aalam ka

hai azal se mujhe farman-e-hakam donon ek

dil mein arman na raha baqi jo chaha so kiya

sair duniya ki bhi aur sair-e-adam donon ek

yar aaghosh mein apne hai muhayya har-dam

bas hai ye mere tain jah-o-hasham donon ek

aarzu 'qasim-ali' dil mein nahin kuchh lekin

chahiye apne tain fazl-o-karam donon ek