عاشقی اک عذاب ہے یارو

عاشقی اک عذاب ہے یارو

دل کا خانہ خراب ہے یارو

چین آئے گا کیوں بھلا دل کو

ماہ رخ بے حجاب ہے یارو

چھین لیتی ہے آدمی کا وقار

مفلسی بھی عذاب ہے یارو

دیکھ کر سرخیٔ لب جاناں

آئنہ لاجواب ہے یارو

کیوں نہ مرنے سے جی لگائیں ہم

زندگی غم کا باب ہے یارو

ہر برس زندگی کا بیتا ہوا

درد دل کا حساب ہے یارو

عشق کہتے ہیں اس مصیبت کو

درد جس کا نصاب ہے یارو

ہجر کا کیوں عذاب ہے دل پر

حسن گر اک سراب ہے یارو

باغ ہستی میں فکر کرب و بلا

آگہی کا شباب ہے یارو

اس لیے بھی عجیب ہے جعفرؔ

اس کی دنیا کتاب ہے یارو