aashiqon ki bhiD mein bhi saf pahchane gae

āshiqoñ kī bhiiḌ meñ bhī saaf pahchāne ga.e

sham' jab raushan huī marne ko parvāne ga.e

shodh karne ke liye jab log pahuñche chāñd par

ham bhī mangal tak tirangā yaar lahrāne ga.e

'ishq meñ is hausle kī daad ham ko aap deñ

jab unhoñ ne chāñd māñgā āsmāñ laane ga.e

yuuñ shahīdoñ vaalā jazba bhī hamāre dil meñ thā

vaqt jab aaya ḳhud apnā shīsh kaTvāne ga.e

ḳhvāb ham ne yuuñ to dekhe āsmāñ se bhī baḌe

par hamesha hī zamīñ ke naam se jaane ga.e

dil se apne thā vo muflis ham samajh paa.e nahīñ

ḳhud tamāsha hī bane jo haath phailāne ga.e

'ishq meñ nākām honā hī faqat taqdīr thī

ham jahāñ pahuñche hamāre saath vīrāne ga.e

dard hai 'mīnā' milā aisā davā jis kī nahīñ

DhūñDhne phir bhī davā ham roz maiḳhāne ga.e

aashiqon ki bhiD mein bhi saf pahchane gae

sham' jab raushan hui marne ko parwane gae

shodh karne ke liye jab log pahunche chand par

hum bhi mangal tak tiranga yar lahrane gae

'ishq mein is hausle ki dad hum ko aap den

jab unhon ne chand manga aasman lane gae

yun shahidon wala jazba bhi hamare dil mein tha

waqt jab aaya KHud apna shish kaTwane gae

KHwab hum ne yun to dekhe aasman se bhi baDe

par hamesha hi zamin ke nam se jaane gae

dil se apne tha wo muflis hum samajh pae nahin

KHud tamasha hi bane jo hath phailane gae

'ishq mein nakaam hona hi faqat taqdir thi

hum jahan pahunche hamare sath virane gae

dard hai 'mina' mila aisa dawa jis ki nahin

DhunDhne phir bhi dawa hum roz maiKHane gae