aashiyan ujDa mera to kya hua

āshiyāñ ujḌā mirā to kyā huā

ġham to is kā hai chaman sahrā huā

thā kuchh aisā hī taqāzā ishq kā

ham ne dekhā apnā ghar luTtā huā

thā kabhī dil ek shahr-e-ārzū

rafta rafta yaas kā sahrā huā

zarra zarra hai dil-e-betāb sā

ik jahāñ hai dard kā maarā huā

kyā ḳhabar thī hogā manzil kā charāġh

ik musāfir rāsta bhaTkā huā

zabt-e-dil kā hausla to dekhiye

ġham kā dariyā hai abhī Thahrā huā

aa.ine ko dekh kar sharmā ga.e

aap ko shāyad mirā dhokā huā

apnī rusvā.ī se maiñ ḳhush huuñ 'nazīr'

ġham to ye hai un kā ġham rusvā huā

aashiyan ujDa mera to kya hua

gham to is ka hai chaman sahra hua

tha kuchh aisa hi taqaza ishq ka

hum ne dekha apna ghar luTta hua

tha kabhi dil ek shahr-e-arzu

rafta rafta yas ka sahra hua

zarra zarra hai dil-e-betab sa

ek jahan hai dard ka mara hua

kya KHabar thi hoga manzil ka charagh

ek musafir rasta bhaTka hua

zabt-e-dil ka hausla to dekhiye

gham ka dariya hai abhi Thahra hua

aaine ko dekh kar sharma gae

aap ko shayad mera dhoka hua

apni ruswai se main KHush hun 'nazir'

gham to ye hai un ka gham ruswa hua