aashiyane ki jab bhi yaad aai

āshiyāne kī jab bhī yaad aa.ī

ek bijlī sī dil meñ lahrā.ī

yuuñ bhī dekhā gayā hai mahfil meñ

vo tamāshā the ham tamāshā.ī

tere āñchal kā jis pe saaya ho

us gadā par nisār dārā.ī

ham ne dāman hī jā liyā un kā

log karte rahe jabīñ-sā.ī

māh-o-anjum meñ lāla-o-gul meñ

ham ko terī jhalak nazar aa.ī

dost aa.e the mujh ko samjhā ne

haal dekhā to aañkh bhar aa.ī

chhā ga.iiñ mastiyāñ fazāoñ meñ

tere dāman kī jab havā aa.ī

jo mohabbat meñ miT gayā 'sābir'

us ne mar kar bhī zindagī paa.ī

aashiyane ki jab bhi yaad aai

ek bijli si dil mein lahrai

yun bhi dekha gaya hai mahfil mein

wo tamasha the hum tamashai

tere aanchal ka jis pe saya ho

us gada par nisar darai

hum ne daman hi ja liya un ka

log karte rahe jabin-sai

mah-o-anjum mein lala-o-gul mein

hum ko teri jhalak nazar aai

dost aae the mujh ko samjha ne

haal dekha to aankh bhar aai

chha gain mastiyan fazaon mein

tere daman ki jab hawa aai

jo mohabbat mein miT gaya 'sabir'

us ne mar kar bhi zindagi pai