aashna mujhe se har ek hur-e-jinan pahle se hai

āshnā mujhe se har ik hūr-e-jināñ pahle se hai

jannatī huuñ merā jannat meñ makāñ pahle se hai

aag siine meñ mohabbat kī nihāñ pahle se hai

go nazar aatā nahīñ lekin dhuāñ pahle se hai

saiñkaḌoñ maujūd haiñ mushtāq-e-dīd-e-rū-e-dost

un kī mahfil meñ hujūm-e-‘āshiqāñ pahle se hai

kyā dikhā.ūñ maiñ use apnā kaleja chiir kar

kab yaqīñ aa.egā us ko bad-gumāñ pahle se hai

terā vahshī kyā karegā apnā dāman tār-tār

josh-e-vahshat meñ garebāñ dhajjiyāñ pahle se hai

yuuñ mujhe Tikte na detā fasl-e-gul meñ bāġhbāñ

vo to yuuñ kahiye chaman meñ āshiyāñ pahle se hai

dekhtī hai chaar tinke bhī kaḌak kar ġhaur se

āshiyāñ kī fikr meñ barq-e-tapāñ pahle se hai

dard kī shiddat hai dil meñ yā-ilāhī ḳhair ho

ibtidā-e-'ishq hai yā imtihāñ pahle se hai

bazm meñ 'ārif' kī kyoñ hotī hai ye āo-bhagat

ġhāliban us par nigāh-e-dostāñ pahle se hai

aashna mujhe se har ek hur-e-jinan pahle se hai

jannati hun mera jannat mein makan pahle se hai

aag sine mein mohabbat ki nihan pahle se hai

go nazar aata nahin lekin dhuan pahle se hai

sainkaDon maujud hain mushtaq-e-did-e-ru-e-dost

un ki mahfil mein hujum-e-‘ashiqan pahle se hai

kya dikhaun main use apna kaleja chir kar

kab yaqin aaega us ko bad-guman pahle se hai

tera wahshi kya karega apna daman tar-tar

josh-e-wahshat mein gareban dhajjiyan pahle se hai

yun mujhe Tikte na deta fasl-e-gul mein baghban

wo to yun kahiye chaman mein aashiyan pahle se hai

dekhti hai chaar tinke bhi kaDak kar ghaur se

aashiyan ki fikr mein barq-e-tapan pahle se hai

dard ki shiddat hai dil mein ya-ilahi KHair ho

ibtida-e-'ishq hai ya imtihan pahle se hai

bazm mein 'arif' ki kyon hoti hai ye aao-bhagat

ghaaliban us par nigah-e-dostan pahle se hai