aashuftagi phir aaj mana le gai mujhe

āshuftagī phir aaj manā le ga.ī mujhe

ik bū-e-rah-guzār-e-balā le ga.ī mujhe

jaanā thā maiñ ne maiñ tire qadmoñ kī dhuul huuñ

duniyā samajh ke phuul uThā le ga.ī mujhe

chāragaroñ ko merī havā tak na mil sakī

chupke se koī shām-e-balā le ga.ī mujhe

tujh ko pukārnā thā na dasht-e-talab meñ dost

duur aur tujh se terī sadā le ga.ī mujhe

ab anjuman meñ baiThā huuñ gum-sum kahūñ bhī kyā

duzdīda ik udāsī churā le ga.ī mujhe

rakhtā bhī kaun pyāse savāloñ kī aabrū

bas merī ḳhāmushī hī nibhā le ga.ī mujhe

us meñ kisī talab kā 'musavvir' na thā savāl

mai-ḳhāne ek laġhzish-e-pā le ga.ī mujhe

aashuftagi phir aaj mana le gai mujhe

ek bu-e-rah-guzar-e-bala le gai mujhe

jaana tha main ne main tere qadmon ki dhul hun

duniya samajh ke phul uTha le gai mujhe

chaaragaron ko meri hawa tak na mil saki

chupke se koi sham-e-bala le gai mujhe

tujh ko pukarna tha na dasht-e-talab mein dost

dur aur tujh se teri sada le gai mujhe

ab anjuman mein baiTha hun gum-sum kahun bhi kya

duzdida ek udasi chura le gai mujhe

rakhta bhi kaun pyase sawalon ki aabru

bas meri KHamushi hi nibha le gai mujhe

us mein kisi talab ka 'musawwir' na tha sawal

mai-KHane ek laghzish-e-pa le gai mujhe