aasman ruTha hua roe zamin ruThi hui

āsmāñ rūThā huā ro.e zamīn rūThī huī

ik balā uftādgān-e-ishq par utrī huī

vo sitam-pesha tamalluq-ḳhū karam-nā-āshnā

merī ḳhuddārī ḳhudī ke soz meñ Duubī huī

zehn-o-dil us kī adā-e-dil-navāzī par nisār

aur zanjīr-e-ġhulāmī paañv meñ bajtī huī

baḳhshtī hai mujh ko ādāb-e-mohabbat kā shu.ūr

āñdhiyoñ meñ ek titlī phuul se lipTī huī

tiir hai TuuTī kamānoñ se koī chhoḌā huā

yā kisī qātil-adā kī ik nazar uḌtī huī

surḳh patthar kī fasīleñ tāj-mahaloñ kā surūr

yād-e-māzī dāstāñ-dar-dāstāñ phailī huī

pyaas se pazhmurda jaise ek rūd-e-regzār

ik nadī kohsār se niklī huī bhaTkī huī

lailā-e-manzil talak kitne nishāñ kitne nuqūsh

rāstoñ meñ jā-ba-jā ḳhushbū tirī bikhrī huī

kyā hasham kyā ḳhāk-rū ḳhāKī hue sab zer-e-ḳhāk

ġhaur kar 'bazmī' ki ye duniyā bhalā kis kī huī

aasman ruTha hua roe zamin ruThi hui

ek bala uftadgan-e-ishq par utri hui

wo sitam-pesha tamalluq-KHu karam-na-ashna

meri KHuddari KHudi ke soz mein Dubi hui

zehn-o-dil us ki ada-e-dil-nawazi par nisar

aur zanjir-e-ghulami panw mein bajti hui

baKHshti hai mujh ko aadab-e-mohabbat ka shuur

aandhiyon mein ek titli phul se lipTi hui

tir hai TuTi kamanon se koi chhoDa hua

ya kisi qatil-ada ki ek nazar uDti hui

surKH patthar ki fasilen taj-mahalon ka surur

yaad-e-mazi dastan-dar-dastan phaili hui

pyas se pazhmurda jaise ek rud-e-regzar

ek nadi kohsar se nikli hui bhaTki hui

laila-e-manzil talak kitne nishan kitne nuqush

raston mein ja-ba-ja KHushbu teri bikhri hui

kya hasham kya KHak-ru KHaKi hue sab zer-e-KHak

ghaur kar 'bazmi' ki ye duniya bhala kis ki hui