aasman se koi tara jo sarak jata hai

āsmāñ se koī taarā jo sarak jaatā hai

aan kī aan meñ ḳhud par mirā shak jaatā hai

bhed kyā kyā haiñ tire shahr meñ aur jangal meñ

aadmī jā ke vahāñ rasta bhaTak jaatā hai

god meñ letā huuñ aur giit sunātā huuñ use

chalte chalte kabhī dariyā bhī to thak jaatā hai

muuñd lete haiñ baneroñ pe kabūtar āñkheñ

dhyān kī chuuk koī panchhī uchak jaatā hai

vahm-e-ḳhush-qāmatī bhī tū ne diyā thā mujh ko

haath ab kyoñ mire shāne se sarak jaatā hai

gul-e-tāza kī tarah vasl kī jab os paḌe

rang us shoḳh kā kuchh aur bhaḌak jaatā hai

aisī ḳhāmoshī hai nau-zā.ida sayyāre par

apnī aahaT se bhī dil apnā ThiThak jaatā hai

vaqt ke dasht meñ uḌte hue lamhoñ kā ġhubār

aañkh meñ aTtā hai hoñToñ pe chipak jaatā hai

aasman se koi tara jo sarak jata hai

aan ki aan mein KHud par mera shak jata hai

bhed kya kya hain tere shahr mein aur jangal mein

aadmi ja ke wahan rasta bhaTak jata hai

god mein leta hun aur git sunata hun use

chalte chalte kabhi dariya bhi to thak jata hai

mund lete hain baneron pe kabutar aankhen

dhyan ki chuk koi panchhi uchak jata hai

wahm-e-KHush-qamati bhi tu ne diya tha mujh ko

hath ab kyon mere shane se sarak jata hai

gul-e-taza ki tarah wasl ki jab os paDe

rang us shoKH ka kuchh aur bhaDak jata hai

aisi KHamoshi hai nau-zaida sayyare par

apni aahaT se bhi dil apna ThiThak jata hai

waqt ke dasht mein uDte hue lamhon ka ghubar

aankh mein aTta hai honTon pe chipak jata hai